بصراحه القصه اللى أنا هاحكيها دلوقتى مش واقعيه... ولا حصلت بجد .... هى قصة خياليه...
بس أكيد فى مواقف شبيهة منها ممكن تحصل لنا فى الحياه...
وأكيد هنتعلم من قصتنا ... دلوقتى ركزوا معايا....
كان يامكان ... ياسعد ياإكرام ... مايحلى الكلام ... إلا بذكر النبى عليه الصلاة والسلام....
كان فى ملك طيب وعادل بيحكم مملكه كبيرة اووووووووى...
كل الناس كانت بتحبه ... وكان عنده وزير طيب اوى وبيحب الملك اوى اوى اوى ....
كان الوزير ده اسمه " رضا "
وفى يوم من الايام.. كان الملك قاعد مع وزيره بيتكلمو فى أمور المملكه ومشكلات الناس ...
وفجأة دخل على الملك واحد من حاشيته .. وقاله : يامولاى يامولاى.. ابنك اللى تعبت فى تربيته وكبرته وراعيته .. وهو راكب على الفرس وقع ومات ..
وقف الملك وقال : إلحقنى يارضا ابنى مات .. ابنى مات يارضا ....
ابتسم رضا .. وقاله : لعله خير .
قاله : بقولك ابنى مات . تقولى لعله خير !!
قاله : أيوة .. لأن ابنك ده انت ربيته أحسن تربيه وتعبت علشان تخليه ولد صالح .. وبكده هيشفعلك عند ربنا وهتدخل الجنه ان شاء الله ....
سكت الملك وقال.. عندك حق يارضا .......
وفى يوم تانى .... قاعد الملك مع رضا ... ودخل واحد من حاشية الملك...
وقال: الحقنى يامولاى .... قاله : فى ايه؟؟؟
قاله : الأرض اللى بنيت فيها بيوت وتعبت فيها ... اتهدمت ووقعت البيوت كلها ......
قاله : الحقنى يارضا .. ملكى ضاع ... والبيوت اللى تعبت فيها ... اتهدمت ...
ضحك رضا ... وقاله : لعله خير ...
قاله : بقولك ملكى اتهدم ..تقولى : لعله خير .....!!!!!
ازاى يارضا .........؟؟؟
رضا قاله : ايوة لعله خير ... لأنك بكده هتضطر انك تبنى بيوت تانيه للفقراء اللى فى المملكه ...
وتبنى البيوت بشكل أجمل ليهم .. وأكيد هايدعولك .. وهتدخل بدعائهم الجنه ...
سكت الملك وقال: فعلا .... عندك حق يارضا...
وفى يوم تالت الملك قاعد مع رضا... وماسك سكينه فى ايده وبيقطع تفاحه ...
وفجأة وهو بيقطعها ... قطع صوبعه اللى فيه خاتم الملك (بضم الميم)...
قاله : إلحقنى يارضا .. الصوبع اللى فيه خاتم الملك .... اتقطع ......
ابتسم رضا وقاله لعله خير.........
الملك قاله : انا زهقت من الراجل ده .... لعله خير ازاى ...
ياحراس ... خدوا الراجل ده وحطوه فى السجن ...
ابتسم رضا ..... وقاله لعله خير .....
ودخل رضا السجن...... وكل الوزراء اللى كارهين الملك... اتجمعوا حواليه ...
وقالوله : رضا مكنش بيخليك تخرج تصطاد ....
تعالى ... نخرجك وتتفسح ... وتتفرج على مملكتك يا أميرنا...
وافق الملك وخرج معاهم ... وفضلوا يمشوا ... لحد ماوصلوا لمكان ....
وسابوا الملك لوحده ورجعم ..... والملك لقى نفسه وقع فى ايد " اكلى لحوم البشر "
أخدوه وربطوه .. واستعدوا علشان ياكلوه ...
وكان عندهم عاده غريبه ... ان الكبير بتاعهم .... يقطع حتة من الايد اليمين فى الرجل
وفعلا ... مسك السكينه .. ولسه هيقطع من ايد الملك ... لقى ايده فيها 4 صوابع ... مش خمسه...
قالهم : يرموه بره أرضهم لأنه شؤم عليهم ... وفعلا مأكلوش الملك ورجع سليم لمملكته ...
وطبعا طلع رضا من السجن ... وحبس الوزراء اللى بيكرهوه ....
وفى يوم قعد هو ورضا ... قاعدة صفا .... وقاله طيب يارضا لما قلت لعله خير على صوبعى لما اتقطع ...
كان فعلا لعله خير ... واكلى لحوم البشر ... تشائموا منى ...
طيب ولما أمرت أنا بحبسك ودخولك السجن ... قلت لعله خير ليه ؟؟؟؟؟
قاله لأنى بحبك اوى .. ومكنتش هسيبك تروح مكان لوحدك ...
وأكيد لو كنا وقعنا فى ايد " اكلى لحوم البشر " كانوا هيسيبوك ... علشان ايدك ...
لكن كانوا هياكلونى أنا ... وكنت هبعد عنك ......
ابتسم الملك وقاله : فعلا لعله خير ......
وتوته توته خلصت الحدوته .... حلوة ولا ملتوته ...
يارب نكون استفادنا وعرفنا ... ان فعلا لازم نقول على كل حاجه """لعله خير """....
الجمعة فبراير 19, 2010 6:20 pm